Malleeshiyaadka Shabaab ayaa deegaanka Biya-Cadde ee Gobalka Shabeellaha Dhexe waxa ay si naxariis darro ah ugu dileen sadex nin kaddib markii ay habeennimadii xalay aqalkii ay daganaayeen ku dhex dileen Wiil, Aabihii iyo nin Oday ah oo reerkaasi Marti u ahaa.
Guddoomiye ku xigeenka Gobalka Shabeellaha dhexe Mudane Axmed Meyri Makaraan oo la hadlay Wakaaladda Wararka Soomaaliyeed ee SONNA, ayaa sheegay in ay gaareen tuulada uu xalay dilka ka dhacay si ay murugada iyo tiiraanyada ula qeybsadaan reerka dhibaatadu ku dhacday.
Mas’uulkan ayaa intaasi ku daray in aysan ogeyn sababta ay u dileen Qoyskaasi, isagoo xusay iney baxsadeen maleeshiyaadki dilka geystay.
Mas’uuliyiin ka tirsan maamulka gobalka iyo kan dagmada ayaa saakay gaaray deegaanka, iyagoo ka qeybqaadanaya Aaska sadaxda qof oo sida gardarada ah ay xalay u dileen maleeshiyaadka kooxda al-shabaab.
