Kulankan ay si wada jir ah u soo qaban qaabiyeen ururka Haweenka Gobolka Banaadir iyo Wasaaradda Waxbarashada, ayna ka qeyb galeen Marwada Madaxweynaha Dalka Marwo Sahro cumar Xasan, Xildhibaanno, xubno ka kala socday Wasaaradaha Haweenka iyo waxbarashada, ururka haweenka gobolka, gabdho qurbo joog ah iyo mas’uuliyiin kale ayaa lagu qabtay xarunta Madaxtooyada ee Villa Soomaaliya.
Kulanka ayaa looga hadlay sidii waalidiinta Soomaaliyeed loogu wacyigelin lahaa in carruurtooda ay u ogoladaan ka qeyb galka Imtixaan mideysan oo dugsiyada sare ee bartamaha iyo koonfurta Soomaaliya ay ka qaadeyso Wasaaradda Waxbarashada, kaasi oo ay kal hore ku heshiiyeen dalladaha Waxbarashada iyo Wasaaradda Waxbarashada.
Jawaahir Baarqab Guddoomiyaha Ururka Haweenka Gobolka Benaadir oo ka hadashay kulanka ayaa xsutay in uu jiro isfaham la’aan u dhexeysa Wasaaradda iyo dalladaha, loona baahanyahay in caqabahaasi laga gudbo.
Agaasimaha Guud ee Wasaaradda Waxbarashada ee xukuumadda Soomaaliya mudane Maxamuud Cabdiqaadir Nuur ayaa hoosta ka xariiqay in imtixaanka midka ah ee laga qaadayo ardayda dugsiyada sare uu yahay heshiis ay kor hore kala saxiixdeen Wasaarada iyo daladaha, waxaana uu ka hadlay muhiimadda uu ardayda u leeyahay.
Xildhibaan Caasho Maxamuud Cumar Caasho Koos oo ka mid ah mudanayaasha Baarlamaanka Federaalka ah ee Soomaaliya ayaa tilmaamtay in Imtixaanka uu ahmiyad u leeyahay dhamaan Ummadda Soomaaliyeed, waxaana ay madaxda daladaha iyo waalidiintuba ugu baaqday inay ogolaadaan imtixaanka.
Marwada Madaxweynaha dalka Marwo Sahro Cumar Xasan oo daah furtay kulanka wacyigelinta ah ee la doonayo in Waalidiinta Soomaaliyeed ay carruurtooda u ogolaadaan ka qeyb galka Imtixaanka Mideysan ee ay Wasaaraddu ka qaadeyso ardayda Dugsiyada sare ee bartamaha iyo Koonfurta Soomaaliya ayaa ka codsatay Waalidiinta Soomaaliyeed inay carruurtooda u ogolaadaan Imtixaanka mideysan
In imtixaan mideysan laga qaado ardayda dugsiyada sare ee bartamaha iyo koonfurta Soomaaliya ayaa ah mid soo bilowday sanadkii 2013,-ka waxaana 30kii April ee sanadkii 2014-ka ay wasaaradda iyo daladaha ku heshiiyeen in imitixaanka dib loo dhigo sandkaas, oo si rasmi ah uu u bilowdo sanadkan aynu ku jirno ee 2015-ka, iyadoo 7-dii April ee sanadkan ay Wasaaradda iyo daladaha markale ku heshiiyeen in la sameeyo guddi labada dhinac ah arrimaha imtixaanaadka dar dargeliya, waxaana iminka muuqaneysa in daladuhu ay ka biyo diidsanyihiin in imtixaan mid ah laga qaado ardayda dugsiyada sare.
