Sarkaal sare oo u hadlay Dowlada Masar ah ayaa beeniyay in Ruushka ay siiyeen 40,000 oo Gantaallo ah, si dalkaasi ay ugu adeegsadaan dagaalka ka dhanka ah Ukraine.
Sarkaalkan oo aan magaciisa la shaacin oo la hadlay shabakada wararka ee Al-Qaahira, kadib warbixin ay daabacday maalin ka hor Washington Post, ayaa waxba kama jiraan ku tilmaamay eedan Masar loo soo jeediyay.
Wargeyska oo soo xiganaya dukumentiyada sirta ah ee Maraykanka ayaa sheegay in madaxda dalkaasi ay si sir ah u gudbiyeen qalabkaasi, iyadoo laga fogaanayo dhibaatooyinka reer galbeedka.
Sarkaalkaan ayaa ku tilmaamay warbixinta Washington Post warar been abuur ah , wuxuuna intaa ku daray in Masar ay raacday siyaasad ahaan nidaamka isku dheellitiran ee lagu go’aamiyo nabadda, xasilloonida iyo horumarka dunida.
Kadib baahinta qeyb ka mid ah dukumeenti sirta ah oo ku taariikhaysan 17-kii Febraayo, ayaa waxaa Masar lagu eedeeyay inay Ruushka siiyaan madaafiic iyo baaruud.
