Guddoomiyaha Gobolka Banaadir ahna Duqa magaalada Muqdisho Mudane Yuusuf Xuseen Jimcaale (Madaale) ayaa maanta kormeeray isbitaalka hooyada iyo dhallaanka ee Banaadir si uu ugu kuurgalo mashruuc samafal ah oo la xiriira caafimaadka indhaha oo ka koobnaa indha-fiiqis, daweyn iyo ookiyaalo qoris oo loo fidiyay dadka Soomaaliyeed ee aan awoodin in ay iska bixiyaan qarashaadka ku baxaya caafimaadka indhaha, gaar ahaan dadka barakacayaasha ah ee ku sugan Muqdisho.
Mashruucan oo ay iska kaashadeen xarunta boqor Salman iyo hay’adda Al-Basar waxaa dalabkiisa lahaa maamulka gobolka Banaadir, waxaana ka faa’iideysanaya ku dhawaad 2,000 oo ruux oo u badan dadka danyarta ah.
Wasiiru-dowlaha Wasaaradda caafimaadka XFS, Drs. Maryan Maxamed Xuseen, agaasimaha caafimaadka, Guddoomiyaha degmada Wadajir iyo agaasimaha Isbitaalka hooyada iyo dhallaanka Banaadir Dr, Fartuun Shariif Maxamed iyo Cumar Ibraahim oo qeyb ka ah xarunta boqor Salman ayaa kormeerkan qeyb ka ahaa, waxeyna dhammaantood gudsoomiyaha gobolka Banaadir uga mahad celiyeen sida ay uga go’antahay horumarinta howlaha samafalka la xiriira sida mashruucan oo kale.
