Xarig jarka mashruucan lagu soo saarayo calafka xoolaha waxaa ka qaybgalay Xildhibaan Cabdirashiid Xidig, Wasiiro ka tirsan Galmudug, maamulka degmada Cadaado iyo mas’uliyiin kale, waxaana mashruucan oo ah habka abuurka casriga ah ee Hayropic ga uu todobaadkiiba soo saarayaa 70 miteric tan
Xildhibaan Cadirashiid Xidig oo ka mid ah mas’uuliyiinta hirgalisay mashruucan ayaa sheegay in hadii la badiyo maalgashiga, la kordhin karo cadadka wax soo saarka calafka, ayna rajaynayaan in deegaanku ka faa’iidaysto.
“Waxaan hantideena galinay mashruucan cusub oo aysan dadku aqoon, si aan ugu qancino inuu waxtar u leeyahay xoolaheenna” ayuu yiri Farxaan Maxamed Dhoorre oo ka mid ah ganacsatada mashruucan maalgaliyey.
Xoola dhaqatada deegaanka oo dhib wayn ku qaba abaarta iyo helista calafka xoolaha ayaa soo dhaweeyey hirgalinta mashruucan, sida uu sheegay Cumar Cismaan Dhiblaawe oo ka mid ah dadka habka casriga ah u dhaqda Geela, kuna nool Cadaado.
Cilmi Cali Cabdi Guddoomiyaha Gobolka Galgaduud iyo Wasiirka hawlaha guud ee Galmudug Axmed Dhiblaawe ayaa balan qaaday in maamul ahaan ay ka shaqaynayaan sidii mashruucan iyo kuwa la mid ka ah ay u guulaysan lahaayeen.
Wajiga 2-aad ee balaarinta mashruucan ayaa maanta laga dhagax dhigay degmada Cadaado, kaas oo la rajaynayo inuu kaalin ka qaato yaraynta khatarta abaaraha.
