Xukunka maanta ay riday maxkamadda darajada koowaad ee ciidammada qalabka sida ee Soomaaliya ayaa lagu riday 9 ruux oo 7 ka mid ah ay ahaayeen maleyshiyaad ka tirsan kooxda nabaddiidka ah ee Al-Shabaab iyo labo askari waxaana xukunku uu iskugu jiraa dil xabsi daa’in, xabsi sanado ah iyo sii daysmo .
Kaaliyaha maxkamadda ciidanka qalabka sida gaaashaanle dhexe Xasan Cabdiraxmaan Aadan ayaa ku dhawaaqay xukunka ay maxkamaddu ku riday ragaan lagu soo eedeeyay dambiyada kala duwan.
“Gacan ku dhiigle Axmed Aweys Xasan waxay ku xukuntay dil toogasho ah, dable Mahad Axmed oo maqane ah waxaa lagu xukumay xabsi daa’in, Cabdi Ibraahim Maxamed waxaa lagu xukumay 10 sanno oo xabsi ciidan ah, Maxamed Maxamuud Xasan sidoo kale 10 sanno oo xabsi ciidan ah, Ciise Maxamuud Cali Jimcaale waxaa lagu xukumay 10 sanno oo xabsi ciidan ah, Cabdisalaan Axmed Tifow 4.sanno oo xabsi ciidan ah, Cabdi Salal Maxamed Miidaan 4 sanno oo xabsi ciidan ah, Sheikh Cali Cismaan Shannin 4 sanno oo xabsi ciidan ah. wabilaahi towfiiq”
Qareenka u doodaya 4 ka mid ah ragaan maanta maxkamada darajada koowaad ee ciidanka qalabka sida ay xukuntay Xasan C/lle Farayare ayaa isagu sheegay in xukunkaas uu racfaan ka qaadanayo oo uu ugudbi
doono maxkamada sare ee ciidanka qalabka sida
“Anigoo ah garyaqaankii daafacayay nimanka afarta ah ee loo haystay dilkii sarkuus ka dhacay horana Maxkamada waan ugu sheegay in ragaasi aysan ahayn ragii galay dambigaas, waxaan idiin cadaynayaa in aan maxkamadda sarre isla aadeyno, anigoo dacwadeyda u soo bandhigaya si sharciga waafaqsan” ayuu yiri Xasan.
