Maxkamadda Gobolka Banaadir ayaa maanta oo taariikhdu tahay 02/07/2020 waxa ay u fariistay dacwad ciqaabeed oo loo heysto shaqsiyad kala duwan oo isugu jiray ganacsato iyo Agaasimaha Maamulka iyo maaliyadda ee Wasaaradda Kalluumaysiga Xukuumadda Federaalka Soomaaliya.
Eedaysanayaashaa oo ku eedeysanaa dambiyo kala duwan oo isugu jira xatooyo xoolo dadwayne, been abuur, isticmaalid dukuminti been abuur ah, isticmaalid Banki aan sharciyaysnayn iyo qodobo kale.
Garsooraha guddoominayay dacwadahaan Dr.Cabdiraxmaan Saciid Axmed ayaa amray in la guda galo dhageysiga difaaca eedeysnayaasha in ay soo gudbiyaan waxyaabaha ay kaga difaacayaan eedaymihii iyo cadaymihii uu Xafiiska Xeer ilaaliyaha Guud ku eedayay soona bandhigay fadhigii hore.
Dood dheer kaddib, Maxkamadda Gobolka Banaadir ayaa soo gabagabeysay eeddii loo heysatay ganacsade Cabdullaahi Maxamed Axmed (Xaaji Gaabow )oo ka qeyb ahaa dacwaddan musuq maasuqa ah waxeyna u dirtay go’aan halka kuwa kale ay maxkamaddu dib ka soo mudayndoonto sida uu ku dhawaaqay Guddoomiyaha Dhegaysiga dacwadda Dr.Cabdirahman Saciid Axmed.
