Xildhibaannada Baarlamaanka Federaalka Soomaaliya ayaa maanta kulan ay ku yeesheen magaalada Muqdisho waxa ay kaga doodeen Hindise Sharciyeedka dhismaha Xisbiyada siyaasadeed ee dalka.
Doodda Hindise Sharciyeedka dhismaha Xisbiyada Siyaasadeed ee dalka waxa ay XIldhibaannadu ku biirinayeen sharcigan aragtidooda ayadoo tallooyinka Mudaneyaasha Baarlamaanku ay ku qotomeen:- tirada xubnaha
xisbiyada furanaya, in shaqaallaha dowladda iyo askarta ay ka mid noqon karaan Xisbiyada, cida noqoneysa diiwaan geliyaha Xisbiyada iyo in la xadido tirada Xisbiyada uu dalku yeelan karo.
Ku simaha guddiga Arrimaha gudaha iyo amniga ee Baarlamaanka Xildhibaan Daahir Amiin Jeesoow oo markii ay Xildhibaannada tallooyinkooda dhiibteen kadib ka hadlay kulanka ayaa uga mahad celiyey Mudaneyaasha Baarlamaanka tallooyinka,waqtiga iyo juhdiga ay geliyeen Sharcigan waxaana uu u ballan qaaday Xildhibaannada in
aragtidooda uu sharcigan ka dhex muuqan doono hadii uu Alle idmo.
Guddoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad oo kulanka Baarlamaanka shir guddoominayey ayaa tilmaamay in ay aragtidooda ku biiriyeen sharcigan 27 xildhibaan
waxaana uu Madaneyaasha Baarlamaanka uga mahad celiyey dulqaadka iyo adkeysiga ay muujiyeen.
Hindise sharciyeedka dhismaha Xisbiyada siyaasadeed ee dalka ayaa markiisii ugu horeysay waxaa soo diyaariyey guddi hoosaad uu Baarlamaanku u sameeyey kadibna waxaa loo gudbiyey Golaha Wasiirrada Xukuumadda Federaalka Soomaaliya oo ayagu wax ka bedel kusoo sameeyey deetana Baarlamaanka dib ugu soo celiyey waxaana sharcigan hada u haray laba marxaladood oo kala ah akhrinta Seddexaad iyo codeyn.
