15-ka May, maalinta dhalinyarada Soomaaliyeed oo ku beegan aas aaskii ururkii dhaliyarada SYL ayaa xalay laga maamuusey Magaalada Dhuusamareeb oo ay ka dhacdey munaasabad balaaran oo ay wadajir usoo agaasimeen Wasaarada dhalinyarada iyo ciyaaraha Galmudug iyo Ururka Dhalinyarada Caasimada, iyadoo goobta oo ay joogeen wasiiro iyo madax ka socotay bulshada rayadka, lagu casuumey waayo joog wax badan kala socdey halgankii taariikheed ee dhalinyaradu u gashey hanashada xuriyada iyo wadooyinkii adkaa ee ay u soo mareen ka guul gaarida dadaalkaasi.
Calas Cabdinuur Barre oo ah gudoomiyaha ururka dhalinyarada Dhuusamareeb iyo qaar ka mid ah ka qayb galayaasha ayaa ku dheeraadey ka hadlida doorka Dhalinyarada ee Dowlad dhisida Soomaaliya iyo ururadii gobonimo doonka sida kii SYL.
Gudoomiyaha Dhuusamareeb Macalin Cabdiraxmaan Geedaqoroow oo ka mid ahaa mas’uuliyiinta madasha kula hadley Dhalinyarada ayaa u jeediyay dardaaran ku qotomey sii wadista himilooyinkii dhalinyaradii Soomaaliyeed ee curiyay dadaalkii lagu tuuray heeryadii gumeysiga.
Omar Abdi Mohamed Guure agaasimaha Guud ee Wasaaradda Dhalinyarada iyo ciyaaraha Galmudug ayaa ugu dambeyn dhalinyarada Soomaaliyeed ugu hambalyeeyay Xuska 15-May oo ah maalin taariikheed.
