Munaasabad lagu maamusayay maalinta Qaaxada aduunka oo ay soo qaban qaabisay wasaarada caafimaadka dowladda fadaraalka Soomaaliya oo kaashaneeysa Hay”adda IMC iyo maamulka isbitaalka koofurta Galkacyo ayaa maanta lagu qabtay magaalada Galkacyo.
Munaasabadaan oo ay ka qeyb galeen madaxweynaha Galmdug iyo xubno ka tirsan golaha wasiirada iyo baarlamaanka Galmudug iyo boqalaal ruux oo ka kala socday xaafadaha magaalada Galkacyo ayaa waxaa ugu horeeyn ka hadlay Axmed kheyr macalin oo ka mid ah howl wadeenada caafimaad ee isbitaalka koofurta Galkacyo waxaana uu sharaxaad ka bixiyay ujeedka loo qabtay munaasabada iyo cidda soo agaasintay waxaana uu yiri “Munaasabadaan waxaa soo qaban qaabiyay maamulka isbitaalka koofurta Galkacyo oo gacan ka helaya hay’adda IMC iyo wasaarada caafimaadka DFS ujeedka loo qabtayna waxay tahay maadaama ay maanta ku beegan tahay maalinta caalamku ay u aqoonsadeen maalinta TB ama Qaaxada in bulshada lagu baraarujiyo khatarta cudurkaas iyo sida ugu haboon ee looga hortagi karo ama loo daweeyn kar.o
Farxiyo Maxamed Ciise Madaxa Caafimaadka Hay’adda IMC ayaa waxa iyana ay halkaasi kasoo jeedisay casharo la xariira sida lagu garto astaamaha cudurka qaaxada isla markaana lagu kala qaado sida uu ku faafo iyo sida ugu haboon ee looga feejignaan karo khatarta cudurka waxaa sidoo kale ay ka warbixisay sida bukaanka qaba cudurka uu u qaadanayo daawada
Munaasabada oo intii ay socatay ay ka hadleen dhaqaatiir caafimaad iyo masuuliyiin ka tirsan labada gole ee Maamulka Galmudug ayaa waxaa soo xiray madaxweynaha Galmudug C/kariin Xuseen Guuleed isagoona sheegay in ay ahmiyad weyn u leedahay bulshada in lagu wacyi galiyo ilaalinta caafimaadka.
“Caafimaadku waa wax muhiim ah dhamaanteena waxaa nalaga rabaa inaan ilaalino caafimaadka bulshada iyo nadaafada deegaanka waxaa sidoo kale laydinka rabaa inaad bulshada ku baraarujisaan faya dhowra deegaanka cudurka qaaxaduna waa cudur si fudud laysugu gudbiyo marka haddii awal dadka la karaantiili jiray maanta waa fududahay daawadaasi waxaana
haboon in bulshada lagu wacyi galiyo ineey tagaan xarumaha caafimaad” ayuu yiri Madaxweyne guuleed.
