Munaasabadaan oo uu soo agaasimay Guddiga dhaqaalaha Qaranka Soomaaliya ayaa diiradda lagu saarayay qorsheynta kobaca dhaqaalaha Soomaaliya 30-ka sano ee soo aadan, waxaana ka soo qeyb galay Wasiiro ka tirsan Xukuumadda Federaalka Soomaaliya, Wasiir ku xigeenno, Agaasimayaal, hay’ado Cilmi baaris iyo qeybaha kaladuwan ee Bulshada.
Inta uu socday daah furkaan ayaa lagu gorfeeyay muhiimadda ay leedahay in la dajiyo qorshaha kobaca dhaqaalaha Soomaaliya 30-ka sano ee soo aadan si dalku uu u yeesho hiigsi iyo horumar dhaqaale oo dagsan.
Guddoomiyaha Guddiga Dhaqaalaha Qaranka Cali Ciise Cabdi ayaa sheegay in kulanka looga doodayay sidii loo horumarin lahaa dhaqaalaha Soomaaliya, loona dajin lahaa qorshe weyn oo dhaqaale.
“Sidii loo sameyn lahaa ummaduna u gaari laheyd himolooyinkooda kobcinta dhaqaalaha loona heli lahaa fikar mideysan oo lagu howl gali karo munaasabadahaan oo kale, waxaa looga hadlaa dariiqii la mari lahaa 5-ta sano ama sadexda sano ee soo socota laakiin tani waa ay ka duwan tahay waxaa laga hadlayaa waddadii horumarka dhaqaalaha loo mari lahaa 30-ka sano ee soo socota” ayuu yiri Cali Ciise Cabdi.
Agaasimaha guud ee Wasaaradda Qorsheynta iyo Maalgashiga Xukuumadda Federaalka Soomaaliya ayaa sheegay in diirada la saarayo sidii ilaha wax soo saarka dalka loo howl gallin lahaa si loo helo koboc dhaqaale
“Ahmiyadda iyo natiijada uu leeyahay kulankaan waan in diirada la saaro dhinaca wax soo saarka cuntada hadii ay noqon laheyd beeraha, kalluumeysiga ka faa’ideysiga khayraadka Dalka iyo sidii loola fal gali lahaa isbadalka Cimilada, waxaana rajeyneynaa in lagu soo daro dowladnimada iyo dib u heshiisiinta”.ayuu yiri Agaasimaha Guud ee Wasaaradda Qorsheynta.
Wasiirka Isgaarsiinta iyo teknoloojiyadda Xukuumadda Federaalka Soomaaliya Cabdi Sheekh Axmed ayaa isna sharaxay waxyaabihii laga wada hadlay intii shirku socday waxa uuna yiri “Manuusabadaan waxa ay aheyd in la sameeyo istiraatiijiyad fog iyo sidii 30-ka sano ee soo socota dhaqaalaha Soomaaliya dib loogu soo kicin lahaa, waxyaabaha laga hadlayo waxaa ka mid ah sidee uga faa’ideysanaa badaan weyn ee aan leenahay, xoolaha iyo khayraadkeenna kale iyo sidii wadanka loogu raadin lahaa dhaqaale iyo maal gallin si aan ula jaan qaadno horumarka Dunida ay sameeneyso”.
