Munaasabadani oo ay soo qaban qaabiyeen Qeybaha kala duwan ee Bulshada koonfur galbeed ee ku dhaqan dalkani kenya ayaa waxa ay isugu jirtay soo dhaweynta wasiiro iyo xildhibaano ka tirsan dowlada gobaleedka koonfur galbeed soomaaliya iyo dhaqaale aruurinta TV iyo idaacad uu yeelanayo Maamulkaasi.
Munasabadan ayaa waxaa ka qeyb galay Mas’uuliyiin ay ka mid ahaayeen wasiiru dowlaha wasaarada warfaafinta,dhaqanka iyo dalxiiska xukuumada Soomaaliya Maxamuud Cabdi Xasan Beekos Xildhibaano ka tirsan baarlamanka Soomaaliya oo uu ka mid ahaa xildhibaan Ibraahim Isaaq yarow,wasiirka warfaqafinta iyo wacyi gelinta ee maamulka koonfur galbeed Ugaas Xasan Cabdi Maxamed Xubno ka socday gudiga ganacsatada Xaafada islii.
Ugu horeyn waxaa Munaasabada ka hadlay Cabdulbari Shiikh Cabdi Salaan oo ah gudoomiyaha Jaaliyada koonfur galbeed ee dalkani Kenya ayaa u mahad celiyay ka qeyb galayaasha munaasabada,isagoo sheegay in munaasabadu ay tahay soo dhaweynta wasiiro ka tirsan maamulka konfur galbeed Soomaaliya.
Wasiirka warfaafinta iyo wacyi gelinta ee koonfur galbeed Ugaas Xasan Cabdi Maxamed oo isna ka warbixiyay hirgelinta TV-ga iyo idaacada loo sameynayo Koonfur galbeed ayaa waxa uu u mahad celiyay wasaarada warfaafinta Soomaaliya oo dhaqaalihii ugu horeeyay ugu Deeqday Warbaahinta la doonayo in laga hir galiyo koonfur galbeed.
“Waxaan rabaa inan u mahadceliyo wasarada warfaafinta,dhaqanka iyo Dalxiisa xukuumada Soomaaliya oo bixisay dhaqalihii ugu horeeyay markii la dhagax dhigay Xarunta TV-ga iyo idaacada”Ayuu yiri wasiirka Warfaafinta Konfur Galbeed.
Micnaha ay u bixiyeena waa inay ku daydaan bulshada reer koonfur galbeed dhistaan deegaanadooda,Waxaana rabaa inan u mahad celiyo wasiirka warfaafinta Maxamed Cabdi xayir maareeye iyo ku xigeenadiisa iyo dhamanba shaqaalaha waaaradiisa”Ayuu sii raaciyay Wasiirka Warfaafinta Konfur Galbeed.
Munasabada ayaa waxaa sidoo kale Khudbad ka jeediyay Xildhibaan Ibraahim Isxaaq Yarow oo ka mid ah mudanayaasha baarlamanka Soomaaliya,Waxana uu yiri “Bulshada koonfur galbeed meel walbo ay joogaan waa inay awoodooda mideyaan si aan dhibaatada uga baxno oo aad garab istaagtaan maamulka, tan soomaaliyana aad qeybtiina ka qaadataan,Soomaaliya oo dhan ayaa dhisma naga sugeyso oo aan ka shaqeyno sidii jamhuuriyadda cagaheeda isugu taagi lahayd oo cadowga looga xoreyn lahaa si aan u gaarnana waa in ay gacmaha is-qabsadaan ummadda Soomaaliyeed”
Wasiiru dowlaha wasaarada warfaafinta,dhaqanka iyo dalxiiska Xukuumada Soomaaliya Maxamuud Cabdi Xasan Beekos oo gaba gabadii munaasabada ka hadlay ayaa waxa uu si kooban uga hadlay qorshaha wasaarada ee hirgelinta Warbaahinta Maamulada ka jira Dalka.
“Wasaarada warfaafinta koonfur galbeed iyo maamul gobaleedyada kale anaga ayaa mideynayno,wasiirka wuu nagala qeyb galay markii la qorayay shuruucda warbaahinta,tan shanta sanana maamul gobaleedyada dhan ayaa nagala qeyb galay,sharci walbo oo uu qaranku leeyahayna dhammaan inta uu qaranka ka kooxabn yahay wey ka qeyb qaadan doonaan”Ayuu yiri wasiiru dowlada Warfaafinta xukuumada Soomaaliya.
“Waxaa jira qalab TV-yo iyo idaacado caalamka aan ka sugeyno hadii ay na soo gaaraana wixii koonfur galbood ku soo aado waxan diyaar u nahay in aan ku wareejino wasaarada warfaafinta idinkana waxaa la idinkaga baahan yahay in aad dadaashan inta laga helayo qalabkaas”Ayuu sii raaciyay wasiiru dowlada warfaafinta ee xukuumada Soomaaliya.
Wasiirka Warfaafinta,dhaqanka iyo dalxiisa ee xukuumada Soomaaliya Maxamed Cabdi Xayir Maareeye iyo wasiirka Warfaafinta iyo wacyi galinta ee maamulka konfur galbeed Soomaaliya Ugaas Xasan Cabdi Maxamed ayaa bishii hore dhagax dhigay xarunta laga sameynayo TV-ga iyo idaacada Maamulkaasi.
Sawir Qaade:-Cabdulkadir Cali Xuseen Koronto
