Kulan looga hadlayay dowrka ay qurbo joogta Soomaaliyeed uga qeyb qaadan lahaayeen horumarinta iyo dib-u-dhiska caasimadda ayaa xalay lagu qabtay magaalada Muqdisho.
Wasiirka warfaafinta, Wasiirka amniga, guddoomiyaha gobolka iyo masuuliyiin kale ayaa ka qeyb galay kulankaan oo ay sidoo kale ku sugnaayeen qaar kamid ah dadka dibadda ka yimid oo howlo kala duwan ka haya magaalada.
Related posts
Guddoomiyaha gobolka Banaadir ahna duqa Muqdisho, Xasan Maxamed Xuseen βMuungaabβ ayaa sheegay in magaalada Muqdisho ay soo kabanayso, isla markaana ay u baahan tahay in dadka Soomaaliyeed ay dhistaan oo aan lagu tiirsanaan kaliya kaalmo ka timaada caalamka.
Wuxuu sheegay in sanadka soo socdo uu maamulku doonayo in la dhiso waddada Wadnaha, mashruucaas ayuu sheegay in looga baahan yahay qurbo joogta iyo dadka wax haysta inay ka qeyb qaataan fulintiisa.
Wasiirka warfaafinta iyo dhaqanka, mudane Maxamed Cabdi Xayir Maareeye oo ka hadlay kulankan ayaa sheegay in cilmiga, maalka iyo maskaxda qurbo joogta Soomaaliyeed loo baahan yahay inay dalka ku soo celiyaan, oo ay ka qeyb qaataan horumarintiisa.
Sidoo kale Wasiirka amniga gudaha, Cabdirisaaq Cumar Maxamed ayaa sheegay in siyaabaha la isu waafajin karo horumarinta iyo ammaanka ay qeyb ka tahay in dadka shaqo loo abuuro isla markaana la hirgaliyo mashruuca derisaynta si ay ciidamada ammaanka iyo dadku isugu xirmaan.
Qurbo joogta Soomaaliyeed ayaa maalgelin ka sameynaya magaalada Muqdisho, ayagoo ganacsi cusub iyo adeegyo kale ka hirgeliyay magaalada Muqdisho iyo gobollada dalka.
