Wararka laga helayo magaalada Addis Ababa ayaa waxay xaqiijinayaan in sirdoonka Ethiopia ee ku daadsan xaafadda Soomaalidu degto ee Bole Mechael ay labadii maalmood ee u danbeeyey si sharci darro ah u qafaasheen muwaadiniin Soomaaliyeed oo ku qaxweynayay makhaayadaha Bole, kuwaas oo ka sheekaysanayey damaca indho la’aanta ah ee Ethiopia ku doonayso inay ku hesho qayb kamid ah badda Soomaaliya ayna ku kala qaybinayso bulshada Soomaaliyeed.
Muwaadiniinta Soomaaliyeed ee la xiray ayaa gaaraya todoba qof (7 qof) oo kasoo jeeda Mogadishu, Jigjiga, Hargeisa, Garowe, Kismaayo, Dhuusamareeb iyo Baydhabo ee dalkaleena Soomaaliya, waxaana dhamaantood lagu beegsaday aragtidooda la xiriirta in aysan aqbali doonin damaca qaawan ee Ethiopia, lamana yaqaan meesha la geeyey ama lagu xiray muwaadiniintan Soomaaliyeed.
Docda kale, caawa abaare 07:30pm fiidnimo ayaa dad u dhashay Ethiopia waxay si bareer ah u dhibaateeyeen oo sharafteeda ugu xad gudbeen gabar Soomaaliyeed oo dukaamaysi u tagtay xaafadda Bole, waxaana arrintaasi markii danbe ka dhashay in bulshada Soomaaliyeed ee ku nool Bole ay ku qanci waayeen dhibaatada dadka Soomaaliyeeed loogu gaysanayo Addis Ababa, kadibna waxaa soo degdegay isku dhac dhex maray bulshada Soomaaliyeed iyo ku Ethipianka ah.
Laamaha amniga Addis Ababa gaar ahaan Police-ka ayaa dhacdadan kadib yimi Bole, iyagoo si bareer ah u beegsaday oo u xirxiray dadkii Soomaaaliyeed ee difaacayay sharaftooda mana jiro qof Ethiopian ah oo ka qayb qaatay isku dhacan oo ay booliska Ethiopia xireen.
