Guddoomiyaha gobolka Shabeellaha Hoose Cabdiqaadir Maxamed Nuur Siidii ayaa xariga ka jaray dhismo cusub oo uu ku shaqeyn doono maamulka deegaanka Janaale ee gobolkaas.
Xaruntan oo si casri ah loo dhisay ayaa waxaa loogu adeegi doonaa Shacabka deegaanka Jannaale oo ka soo kabanaya dhibaatadii nololeed ee Al-Shabaab mudadii ay halkaas joogeen kala kulmeen.
Munaasabad kooban oo lagu qabtay xarunta ayaa waxaa ka hadlay guddoomiyaha magaalada Marka ee xarunta gobolka Shabeellaha hoose C/llaahi Waafow oo sheegay in nolosha shacabka deegaanka Janaale ay dib u soo noqotay,islamarkaana loo baahan yahay in ay ilaashadaan xaruntan casriga ah ee adeega dadweynaha qeyb muhiim ah ka qaadan doonta.
Guddoomiyaha gobolka Shabeellaha hoose Mudane Cabdiqaadir Maxamed Nuur Siidii ayaa tilmaamay in maamulka gobolka qorshihiisa koowaad uu yahay dib-u-dhiska xarumaha muhiimka ah u ah bulshada iyo soo nooleynta adeegyada dadweyne,wuxuuna shacabka ku dhaqan deegaanka Jannaale ku ammaanay dowrka ay ka qaateen nabadda.
“ Jannaale waa deegaan aad u balaaran, Soomaaliya waxay u ahaan jirtay Dowladdii dhexe meesha canshuurta laga qaado, Soomaaliya waa Beeraley marka lagu leeyahay waa Jannaale iyo inta soo raacda,meeshan waa meeshii madaxweynayaasha lagu soo dhoweyn jiray,” ayuu yiri Guddoomiye Siidii.
Guddoomiye Cabdiqaadir Maxamed Nuur Siidii ayaa madaxweyne Farmaajo ka rajeeyay inuu soo booqdo deegaanka Jannaale oo hadda shacabkeeda ku naaloonayaan nabad iyo xasilooni Alle ka sokow mas’uul uu ka yahay in cadowga laga dul qaado shacabka deegaanka madaxweynaha JFS Mudane Maxamed Cabdullaahi Farmaajo.
Ciidamada Xoogga dalka oo kaashanaya kuwa AMISOM ayaa Al-Shabaab ka xoreeyay deegaanka Jannaale oo muddo sanado ay ku gumaado jireen dadka shacabka ah una diideen in ay helaan nolosha asaasiga ah ee ay Shacabka u baahan yihiin.
