Magaalada Nairobi ayaa waxaa lagu qabtay barnaamij lagu soo bandhigayay Dhaqanka Soomaaliyeed oo ay ka qeyb galeen Mas’uuliyiin ka tirsan Dowladda Soomaaliya, Aqoonyahano,iyo marti sharaf kale, waxaana barnaamijkaasi soo qaban qaabiyay Ururka Midowga Yurub.
Xildhibaan Maxamed Cumar Dalxa oo ka mid ah Xildhibaannada Soomaaliyeed islamarkaana kulankaasi lagu soo bandhigayay Dhaqanka ka qeyb galay ayaa warbaahinta ugu waramay, isagoo sheegay in barnaamijkaasi uu ahmiyad gaar ah u lahaa dadka Soomaaliyeed sarena loogu qaaday dhaqanka Soomaaliyeed.
Xildhibaan Dalxa ayaa waxa uu sheegay intii uu socday soo bandhigida dhaqanka Soomaaliyeed in lagu soo bandhigay dhaqanka Soomaaliyeed ee soo jireenka ah, oo uu tilmaamay in uu yahay kan isku keenaya Dadka Soomaaliyeed.
“Shirkani waxaa uu ahaa mid looga hadlayay kor u qaadida dhaqanka Soomaaliyeed Wasiirka Warfaafinta Soomaaliya Maxamed Cabdi Xayir Maareeyee Khudbad uu kaga hadlayo dhaqanka Soomaaliyeed uu ka jeediyay, Qoraaga Soomaaliyeed Nuur-Diin Faarax oo isna ka qeyb galay shirka ayaa faah faahin ka bixiyay Dhaqanka Soomaaliyeed fikrado dhaqanka ku saabsana ka jeediyay madasha” ayuu yiri Xildhibaan Dalxa.
Wasaaradda Warfaafinta Dhaqanka iyo Dalxiiska Xukuumadda Federaalka Soomaaliya ayaa dadaal ugu jirta sidii ay u horumarin laheyd dhaqanka Soomaaliyeed, waxaana gobolada Banaadir, Shabeelaha dhexe, iyo Shabeelaha hoose ka bilowday barnaamijyo dhaqanka Soomaaliyeed lagu xoojinayo mudo 3 bilood ah taasi oo wax badan ka badali doonta fahamka dhaqanka Soomaaliyeed ee Jiilka Soo Koraya.
