Khamiistii la soo dhaafay oo ay taariikhdu ku beegnayd 18/10/2018, ciidanka amniga ayaa madaarka Muqdisho ku qabtay shakhsi doonayay in garaanka kala dhoofo lacag been abuur ah oo isugu jirta dollar iyo Euro.
Lix saac kadib Marka la qabtay lacagtaasi waxa ay ciidamada Amnigu ku guuleysteen in magaalada daafaheeda ay ka soo qabtaan shabakadii howshaasi ku howlaneed oo dhamaystiran.
Qoraal lagu daabacay barta Twitter-ka ay ku leedahay hey’adda Nabad sugidda iyo Sirdoonka Qaranka ee NISA ayaa lagu xaqiijiyay warkan.
Ciidamada Sirdoonka Soomaaliya ayaa muddooyinkii u dambeeyay xoojiyay howlaha sugidda Amniga dalka, iyagoo ka hortagay falal isugu jiray Argagixisanimo, burcad dadweynaha isbaareysanayay iyo shabakado isku xiran oo ka shaqeynayay daabicista lacag been abuur ah oo lagu dhacayay ganacsatada Soomaaliyeed.
