Qoraal ay soo dhigtay bogga twitter-ka Hey’adda Nabad sugida iyo SIrdoonka Qaranka ayaa lagu sheegay in Horjoogaha Kooxda Alshabaab Axmed Diiriye oo loo yaqaano Abuu cubeyda koox ka amar qaadata in ay magaalada Bu’aale ku dileen horjoogihii hore ee kooxda u qaabilsanaa shirqoolada dilalka dadka Muqdisho Cumar Macalin Macaawiye.
Maleeshiyaadka Kooxda Alshabaab waxa kale oo ay xabsiga dhigeen madaxa howlgalada Khaarijinta dadka ama Amniyaatka kooxda ee gobolka Banaadir Cumar Maxamed sida ay xogta ku shaacisay Hey’adda NISA.
“Saqdii dhexe ee xalay ayaa Bu’aale lagu dilay Muuse Macalin, oo horay isaga casilay madaxii Amniyaatka G-Banaadir ee AS, sidoo kale waxaa Xabsiga loo taxaabay madaxa hawlgalinta Amniyaatka G-Banaadir, Cumar Maxamed, iyadoo lafulinayey amarka Horjoogaha Maafiyada AS Axmed Diiriye” ayaa lagu yiri Qoraalka NISA
Khilaafka Horjoogayaasha Alshabaab ayaa cirka isku sii shareeraya sida muuqata bishii la soo dhaafay xog baahisay hey’adda NISA ayaa lagu sheegay in horjoogayaasha sare ee kooxda ay u kala jabeen laba garab oo kala taabacsan Horjooge Mahad Karataay iyo Horjoogaha kooxda Axmed Diiriye, khilaafkooduna xoogeysatay kadib markii uu iscasilay 13kii bishii tagtay ee February Cumar Macalin madaxii Amniyaatka gobolka Banaadir ee xalay la dilay.
Horjoogayaasha kooxda ayaa la aaminsan yahay in khilaafkoodu uu salka ku hayo kala aamin bax iyo in ay isku haystaan maamulka kooxda oo ku dhisan xasuuqa shacabka.
