Isu-duwaha howlaha gar gaarka bani’aadanimo ee jimciyadda qurumaha ka dhexeysa Philippe Lazzarini ayuu si guud uga hadlay arimaha bani’aadanimada, xiritaanka shirkadihii xawaaladaha, iyo amaanka shaqaaalaha gar gaarka eek a howlgala Soomaaliya.
Philippe Lazzarini ayaa muujiyay in Soomaaliya ay ka jirto baahiyo dhanka bani’aadanimada ah isla markaana ay tahay in lagu xisaabtamo in weli loo baahan yahay gurmada deg deg ah si loo badbaadiyo nolosha bulsho badan oo Soomaaliya ku nool kuwaasi oo u baahan adeegyada nolosha aasaasiga u ah.
“waxaanu la macaamiilnaa waddan haatan dib u soo kabsanaya oo marxalado kala duwan soo marey, waa in la ogaadaa in weli howlaha gargaarka bani’aadanimo ay yihiin baahidoodu mid aan fari ka qodnayn“ ayuu yiri Philippe Lazzarini
Wuxuu sheegay in 3 million oo ruux ay u baahan yihiin gargaar bani’aadanimo, 740, 000 oo dadkaasi ka mid ah ayaan helin waxyaabaha nolosha asaasiga u ah, waxana ku jira laba boqol oo kun oo caruur ah oo nafaqo darro haysato.
Mr. Lazzarini ayaa dhinaca kale sheegay in bulshada Soomaaliyeed ay wajahayso caqabado ka dhashay xayiraadda xawaaladaha, Mareykanka, Audtralia iyo Kenya ayaa xiray xawaaladaha Soomaalida, Philippe Lazzarini wuxuuna xusay in boqolkiiba 40 Soomaalida ay ku nool yihiin lacagaha dibadda ah.
