Premeir Bank ayaa maanta daah-furay adeegyo banki oo u gooni ah qurbo-joogta Soomaaliyeed, iyadoo shir jaraa’id oo Madaxda Bankiga qabteen ay ku faah faahiyeen adeegan cusub.
Madaxa howl galada ee Bankiga Primeir Bank C/risaaq Maxamed Axmed oo maanta shir jaraa’id ku qabtay xarunta dhexe ee bankiga oo ku taal magaalaada Muqdisho ayaa sheegay in adeegan uu ka bilowday dalalka Mareykanka, Kenya iyo Ingiriiska, laguna baahin doono dalal kale.
Adeegan ayaa u ogolaanaya Soomaalida ku nool dalalkaas inay helaan adeeg banki oo isku xiraya dalka iyo dibadda
“Waa Adeeg ka kooban 5 qeybood oo kala ah; in qofka qurbo joogta uu ogaan karo dhaqdhaqaaqyada xisaabaadkiisa, ayna ku soo dirsan karaan dhaqaalahooda oo ugu darsameysa xisaabaadkooda ama ay u diri karaan qofka ay rabaan, bankiga isagoo ka ambaqaadaya horumarka dalka waxa uu sahlayaa in maalgashi uu sameeyo” ayuu yiri C/risaaq Maxamed Axmed oo ah madaxa Oparations-ka.
Adeegyada banki ee qurbo-joogta bankiga Premier ee maanta la daah-furay ayaa ka kooban xirmo adeeg ah oo isugu jirta:
1- Xisaabta socota (Current account),
2- Adeegga Master Card debit oo macmiilku xisaabtiisa lacag kaga la bixi karo meel kasta
oo uu adduunka ka joogo.
3- Adeegga swift-ga oo sahlaya in macmiilka qurbo-joogaha ah lacag ku soo dirsan karo
kana dirsan karo xisaabtiisa ka furan Premeir Bank.
4- Adeegga bixinta biilasha oo macaamiisha qurbaha u ogolaanaya in ay si sahlan u bixiyaan biilasha ay u soo diraan Soomaaliya iyaga oo adeegsanaya xisaabaadka ay ku leeyihiin Premier Bank
5- Iyo maal gelinta qurbo-joogta oo ka kooban xirmada maalgelinta ganacsiga iyo xirmada, maal-gelinta guryaha iyo hantida ma-guurtada ah.
Premier Bank ayaa bixinta adeegan banki ee qurbo-joogta waxaa kala shaqayn doona wakiillo bankigu si sharci ah ugula heshiiyay hubinta iyo soo gudbinta document-yada macaamaiisha xisaabaadka loo furayo ee ku sugan dalalka adeegan lagu diyaariyay ee Maraykanka, Ingiriiska iyo Kenya.
Premier Bank ayaa sidoo kale diyaariyay shaqaaale iyo khadad taleefan oo si gooni ah loogu talo galay caawinaadda macaamiisha qurbaha.
Bankiga ayaa ballan qaaday in uu dhawaan bilaabi doono adeegyo kale oo la jaan-qaadaya baahida Soomalida ku nool qurbaha oo bankigu soo bandhigi doono xilligooda.
