Golaha loo dhan yahay ee Qaramada Midoobay ayaa Jimcihii, meel mariyay qaraar Maxkamadda cadaaladda ugu baaqaya inay tixgeliso arrinka ku saabsan gaboodfalada Israa’iil ay ka wado dhulka reer Falastiin.
Qaraarka ayaa sidoo kale Israa’iil ugu baaqaya in ay joojiso hawlaha degaameeynta ee ay ka waddo dhulka falastiin, inkastoo Golaha loo dhan yahay uusan laheen meel marinta go’aankan.
Meel marinta Qaraarkan ayaa waxaa golaaday 87 dal, 26 ayaa diiday, halka 53 kalana ay ka aamuseen, sidokale dalalka reer galbeedka ayaa ku kala qeybsameen arrintan, inkastoo dhamaan dalalka Carabta ay cod aqlabiyad ah ku ansixiyeen qaraarkan.
Dalalka Mareykanka, UK iyo Jarmalka ayaa ka soo horjeestay meelmarinta qaraarkan, halka Faransiiska uu ka aamusay.
Qoraalka ka soo baxay Qaramada Midoobay ayaa ugu baaqay Maxkamadda Caalamiga ah ee fadhigeedu yahay magaalada Hague, inay go’aamiso waxa ka dhalan karo xadgudubka iyo gabood falka joogtada ah ee ciidamada Israa’iil ay ku hayaan Shacabka Falastiiniyiinta.
Ergayga Falastiiniyiinta ee Qaramada Midoobay, Riyaad Mansuur, ayaa sheegay in codbixinta ay fariin u dirtay Netanyahu, isagoo ammaanay waddamada ka dhiidhiyay dhibateeynta shacabka Falastiin ee qaraarkan meel mariyay.
