Warbixin kasoo baxday Qaramada Midoobay ayaa looga hadlay dhaq dhaqaaqa ay kooxda Daacish (ISIS) ka wado dalka Liibiya.
Qaramada Midoobay ayaa sheegtay in boqolaal kamid ah saraakiishii kasoo dagaalamay dalalka Ciraaq iyo Liibiya ee asal ahaan kasoo jeeda Liibiya ay wadankaasi dib ugu noqdeen si ay halkaasi uga dhisaan maamul u gaar ah ISIS.
Tirada dagaalyahanada ISIS ee ku sugan Liibiya ayaa lagu sheegay inay u dhaxeyso 2000 illaa 3000, waxaana la sheegay in xoogoodu ay ku sugan yihiin magaalada Sirte ee wadanka Liibiya.
Hogaanka ISIS ayaa sheegay inuu daneenayo dalka Liibiya inuu ka dhigto saldhigooda Afrika maadaama dalkaasi uu xaduudo badan laleeyahay dalalka Afrikaanka iyo dhanka bada oo uu aad ugu dhaw yahay Qaarada Yurub.
Xaalada amni xumo iyo degenaansho la’aan ee ka jirta dalka Liibiya ayaa la sheegay in kooxda ISIS ay u fududeesay inay si dardarleh ulla wareegaan qeybo kamid ah dhulka xeebta saaran ee wadankaasi Liibiya oo ay hada ka dagaalamaan kooxo badan oo hubeysan kuwaasi oo wadankaasi ku xoogeystay tan iyo markii xukunka laga tuuray Madaxweynihii hore Col.Qadaafi.
