Ergayga gaarka ah ee xoghayaha guud ee qaramada Midoobay u qaabilsan Soomaaliya Nicolas Kay ayaa soo dhaweeyay shirkii shalay lagu soo gabagabeeyay magaalada Muqdisho ee lagu dhisay madasha wada-tashiga Qaran.
Wuxuu sheegay ergaygu in Qaramada Midoobay ay taageereyso madashan, ayadoo la shaqeyneysa dowladda Federaalka ah “Qaramada Midoobay waxay taageeri doontaa hannaankaan wada-tashi, ayadoo la shaqeyneysa dowladda federaalka ah iyo dhinacyada kale ee ka shaqeynaya” ayuu yiri Danjire Kay.
Sidoo kale wuxuu ergaygu tilmaamay in loo baahan yahay in talada laga qeyb galiyo dhammaan dadka Soomaaliyeed oo ay ku jiraan qurbo-joogto.
Dowladda Soomaaliya ayaa shalay soo gabagabeysay shir looga hadlayay sida waddanka looga qaban karo doorasho sanadka 2016-ka, kaas oo ay ka qeyb galeen baarlamaanka, xukuumadda, maamullada gobollada iyo wakiilo ka socday beesha caalamka. Shirkaas waxaa lagu dhisay Madal Wadatashi oo ay dowladdu hoggaaminayso, taas oo ka shaqeyn doonta sidii loo heli lahaa dowladda cusub sanadka 2016-ka.
