Magaalada Brussels waxaa lagu soo gabagabeeyay shir looga hadlayo ururinta kaalmo dhaqaale oo ujeedada laga lee yahay ay tahay sidii dawladaha caalamku ay gacan uga gaysan lahaayeen dhaqaalaha laf-dhabarta u ah dib-u-celinta qaxootiga Soomaaliyeed ee ku nool dalalka dariska la ah Soomaaliya , gaar ahaan kuwa iskood u doonaya in ay dib ugu noqdaan dalkooda hooyo.
Shirkan waxaa ka qeyb galay ra’iisal wasaaraha Soomaaliya, xubno ka tirsan Golaha wasiiradda iyo sidii kaloo wakiilo ka socda UNHCR, Qaramada Midoobay, Midowga Yururb, AU, IGAD iyo madax ka socota dalalka Kenya, Ethiopia iyo Uganda.
Shirka ayaa waxaa laga soo saaray war-murtiyeed ka kooban dhowr qodob oo ka hadlaya natiijada shirka, waxaana ka mid ah in waddamada deeq bixiyaasha iyo QM ay si dhab ugu gurmadaan dadka qaxootiga Soomaalida ee ku nool waddamada dariska sidda Kenya, Jabuuti iyo Yemen.
Waxaa kaloo warmurtiyeedka mid ah in dhaqaalaha lagu yaboobay shirka in si degdeg ah loo bixiyo si loogu fuliyo mashaariic ay ka mid yihiin waddooyin loo dhisaayo qaxootiga Soomaalida ee ku nool waqooyiga galbeed ee Soomaaliya.
Dhaqaalaha lagu yaboohay shirka waxaa ka badan tahay 100 Milyan oo dollar in kastoo waddamada qaar ee ka qeybgalay shirka ay sheegeen in dib ay ugu biiri doonaan yabooha loo fidinaayo qaxootiga Soomaalida ee ku nool waddamada dariska.
Waxaa kaloo shirka aad looga hadlay siddii fursado loogu abuuri lahaa qaxootiga Soomaalida ee doonaya in ay dib dalka ugu soo laabtaan.
Waxaana dhammaan dhinacyada ka qeybgalay ay hoosta ka xariiqeen in waddamada la mid ah Soomaaliya ee hadda ka kabanaya dagaallada in ay Soomaaliya ugu wanaagsan tahay.
