Ku dhowaad 50 million oo carruur ah oo aduunka ku kala nool ayaa ah kuwo ka gudbay xuduuda wadamadooda ama waa ku colaadaha ay ku qasbeen in ay ka barakacaan deegaankooda, sida lagu sheegay warbixin dhowaan soo saartay QM.
Warbixintan ayaa waxaa soo aruurisay laanta qaramada midoobay u qaabilsan carruurta ee UNICEF, waxayna sheegaysaa in in ka badan nus milyan oo carrur ah ay ka qaxeen rabshado iyo amni la’aan.
Tirada Carruurta soo koreysay ayaa isku dheeli tir la’aan ka dhigaysa marka loo eego kuwa qaxootiga ah, waxayna taasi tahay in sadex dalool tirada dadka aduunka ay yihiin carruur oo nus kamid ah tiradaasna yihiin qaxooti.
Warbixintan gaarka ah ayaa lagu sheegay in sanadkii la soo dhaafay dalalka Suuriya iyo Afghanistan carruurta qaxootiga ah ee ka timid ay tahay nus kamid ah marka loo barbardhigo 10 sano ee la soo dhaafay, sida ay sheegtay laanta qaramada midoobay u qaabilsan qaxootiga ee UNHCR.
Unicef ayaa warbixintan soo saartay todobaadyo ka hor inta uusan furmin shirka golaha loo dhan yahay ee qaramada midoobay, kaas oo madaxda la filayo in ay diiradda ku saaraan xal u helidda dhibaatooyinka daba dheeraaday ee ka jira dalalka Syria, Yemen, Afghanistan, Suudaanta koofureed iyo xasaradaha ka jira qeybo kamid ah bariga dhexe.
“Carruurta mas’uul kama ahan qaraxyada, rasaasta, burcada hubeysan, xadgudubyada, baab’inta dalagyada iyo hoos u dhaca dakhliga maalinlaha ee qoyska oo keentay in guriyahooda ka cararaan,” ayaa lagu yiri warbixinta.
Warbixinta ayaa tibaaxday in Turkiga uu martigeliyay tiradii ugu badneynd ee qaxooti ah kuwaas oo ka cararay dalka Suuriya, sidoo kalena noqoneysa tiro aad u badan oo carruur qaxooti ah. Dalka Lubnaan ayaa sidoo kale waxaa uu hoysiiyay qaxooti Suuriyaan ah taas oo qiyaastii ka dhigaysa shantii qofba uu mid kamid ah uu yahay qaxooti.
