Xafiiska isku xiraha arrimaha bini’aadinimada QM ee OCHA ayaa codsatay ugu yaraan 451-milyan oo dollar si wax looga qabto saameynta ay yeelan karaan roobabka Ilino oo la filaayo in ay ka da’aan qeybo ka mid ah waddamada geeska Afrika.
OCHA ayaa sheegtay in roobabka ay saameen ku yeelan karaan inta u dhexeysa 2.7 iyo 3.5 million oo qof kuwaasoo ku nool geeska Afrika ilaa sannadka 2016-ka.
OCHA ayaa warbixintan soo saartay Jimcihii shaley waxaana ay si gaar ah u codsatay 30 milyan oo dollar taasoo wax looga qabanaayo saameenta roobabka Ilino ee Soomaaliya ku soo wajahan.
Roobabka Ilino ayaa horrey ugu dhuftay gobalka waxaana ay saameen ku yeesheen 3.4 Milyan oo qof intii u dhexeysay 2006 ilaa 2007-dii, sidoo kale sannadkii 2010 waxa ay saameeyeen 14 Milyan oo qof.
Sidda laga soo xigtay OCHA, cuntada loo baahan yahay gobalka ayaa la filayaa in ay kordhaan 83% taasoo la micno ah in 12 milyan oo qof ay u baahan yihiin cunno tan iyo billowgii sannadkan 2015-ka, waxaana la filayaa in ay gaarto 22.1 million oo qof ilaa sannadka 2016.
