Deeq isugu jirta raashiin iyo biyo nadiif ah ayaa loo qeybiyay boqolaal qoysas ah oo ka mid ah kuwa ka soo hayaamay deegaannada ay abaaruhu saameeyeen ee gobolada dalka ,isla markaana soo gaaray degmada Kaxda ee gobolka Banaadir.
Dadkan oo u badan haween iyo carruur oo ay ka muuqato diifta ay ku reebtay abaarta ayaa waxaa deeqda gaarsiiyay Ururka Haweenka Qaranka oo ay u soo wakiisheen guddiga gurmadka abaaraha ee heer Qaran, iyadoo ay wehliyaan mas’uuliyiin uu kamid yahay ku simaha guddoomiyaha gobolka Banaadir Ismaaciil Macalin Cabdi Guure iyo xubno kale oo maamulka gobolka katirsan.
Guddoomiyaha degmada Kaxda Maxamed Ismaaciil C/laahi oo goobta ka hadlay ayaa waxaa uu u ka mahadceliyay dadkii soo agaasimey gurmadkan, isagoo sheegay in degmada maalin walba ay soo gaaraan dad aad u nugul oo abaarta saameysay.
Batuulo Sheekh Axmed Gabale oo ah guddoomiyaha ururka haweenka Qaranka ayaa ka hadashay noocyada deeqdan ay ka kooban tahay, waxayna dadka barakacyaasha ah ugu laab qaboojisay in ay ka bixi doonaan dhibaatada heysata dadkan.
Guddoomiye ku xigeenka maamulka gobolka Banaadir ahna ku simaha guddoomiyaha gobolka Ismaaciil Macalin Cabdi Guure ayaa sheegay in maamulada degmooyinka la amray in ay ka shaqeeyaan u gurmashada dadka soo barakacay, isagoo baaq u direy dhammaan dadka Soomaaliyeed in ay gurmad gaarsiiyaan dadka dhibaatada abaarta taabatay.
Dad badan oo kamid ah kuwa ay saameysay abaarta ku dhufatay gobollada dalka ayaa soo gaaray qaar ka mid ah degmooyinka gobolka Banaadir.
