Qurba joogta ka soo jeeda Gobalka Hiiran ee ku nool Wadanka Australia ayaa dib u dhis ka bilaabay wadooyinka magaaladda Beladweyne ee xurunta gobalkaasi.
Qaar kamid ah ganacsatada magaalada Beladweyn oo la hadlay Radio Muqdisho ayaa soo dhaweeyay dadaalka qurba joogta ay dib ugu dhisayaan dalkooda, iyagoo sheegay in ay dhibaato ku qabeen wadooyin badan oo ay Jaaliyadda Soomaaliyeed dib-u-dhis ay ku sameeyeen.
Guddoomiyaha Ururka Dhallinyarada gobolka Hiiraan Maxamad Cabdullaahi Buraale ayaa sheegay in farxad weyn ay u tahay shacabka ku nool magaalada Beladweyne in dib u dayactir lagu sameeyo waddada suuqa Yoobsan ee Beladweyne.
“Annaga ayaa isku filan hadii aan wax isku darsano waan dhisan karnaa wadooyinkeena bur bursan, waxaan hubaa hadii ay sidaan dadka Soomaaliyeed isku taakuleeyaan in aan horumar gaari doonno” ayuu yiri Guddoomiye Buraale.
Ganacsatada ayaa ugu baaqay bulshada ka soo jeeda gobolka Hiiraan in sidaan oo kale ay dib u dhis ugu sameeyaan wadooyinka kale ee bur bursan, si looga maarmo kaalmo dibadda uga timaada shacabka reer Hiiraan.
