Qunsulka safaaradda Soomaaliya ee dalka Yemen, Axmed Suudaani ayaa sheegay in maanta ay ka rajo qabaan inay billaabaan howsha lagu soo rarayo Markab ay dowladda Soomaaliya u dirtay dalka Yemen si uu u soo qaado dadka Soomaaliyeed ee ka soo cararaya dagaallada ka socda waddankaasi.
Axmed Suudaani oo ku sugan dekadda Mukalla ee dalka Yemen ayaa sheegay in wada-hadallo ku saabsan sida dadka loo saari karo Markabka ay la leeyihiin masuuliyiinta dekadda iyo degaanka.
“Wada-hadallada aan kula jirno maamulka iyo guddiyada diiwaan galiya qaxootiga inay maanta noo soo dhammaadaan ayaan rajaynayaa, Markabka hadda xirana aan ku xigsanno oo aan berriba billowno sidii dadka loo saari lahaa Markabka” ayuu yiri Suudaani.
Qunsuliyadda Soomaaliyeed ee magaalada Cadan ayaa diiwan galin ku wadda dadka Soomaalida ah ee doonaya inay soo raacaan markabkan oo keeni doona magaalada Boosaaso.
“Dad Soomaaliyeed oo ku sugan meelo kala duwan sida xerada Al-Kharas iyo magaalooyin kale ayaa nala soo xiriiray, waxaana diiwaan gelin wadda qunsuliyaddeena Cadan, waxaan rajaynaynaa in dhammaan dadka doonaya in dalkooda loo qaado aan Markabka saarno” ayuu yiri Suudaani.
