Wasiirka Ganacsiga iyo Warshadaha Xukuumadda Federaalka Soomaaliya Xildhibbaan Jibril Abdirashid Haji Abdi, ayaa maanta xafiiska ku soo dhaweeyey Ra’iisal Wasaare ku xigeenka dalka Mudane Salah Ahmed Jama oo Wasaaradda ku yimi kormeer shaqo oo uu ugu kuur-galaayey hawlaha shaqo ee baaxadda leh ee Wasaaraddu ay u hayso shacabka Soomaaliyeed.
Wasiirku, wuxu Ra’iisal Wasaare ku xigeenka dalka uu warbixin ka siiyey hawlaha shaqo ee Wasaaradda, qorsheyaasha horumarinta Ganacsiga, Warshadaha iyo Maal-gashiga, iyo guud ahaan dedaalada ay sameeyeen, iyo caqabadaha jira inta ba.
Ra’iisal Wasaare ku xigeenka dalka Mudane Salah Ahmed Jama, wuxu mas’uuliyiinta Wasaaradda ku boggaadiyey shaqada wanaagsan ee ay u hayaan qaranka, waxaana uu ku booriyey in dedaalka la sii laban laabo si loo xaqiijiyo balanqaadkii wax-qabad iyo fulinta adeega bulshada.
Ugu dambayn, wuxu Ra’iisal Wasaarahu kormeer ku tagay qaar ka mid ah xafiisyada Wasaaradda oo uu ugu kuurgalay hawlaha shaqo ee ka socda.
