Ra’iisul Wasaare ku xigeenka Xukuumadda Federaalka Soomaaliya Mudane Mahdi Maxamed Guuleed, ayaa maanta booqasho ku tagay Safaaradda Soomaaliya ee Dalka Qatar, isaga oo halkaas ay ku soo dhoweeyeen Danjiraha Jamhuuriyadda Federaalka Soomaaliya ee Qatar Mudane Cabdirisaaq Faarax Cali Taano iyo diblomaasiyiinta ka hawlgala Safaaradda.
Ra’iisul Wasaare ku xigeenka Dalka oo hadal u jeediyey mas’uuliyiinta iyo hawlwadeennada Safaaradda ayaa kula dar-daarmay diblomaasiyiinta ka hawlgala Safaaradda in ay dadaal dheeriya ku bixiyaan u adeegidda shacabka Soomaaliyeed iyo ilaalinta danaha, sumcadda iyo sharafka dalkeenna oo ah waajibka Qaran ee loo igmaday.
Waxaa booqashada Ra’iisul Wasaare ku-xigeenka ku weheliyey Xildhibaannada Baarlamaanka Federaalka Soomaaliya ee kala ah Axmed Cusmaan Diiriye, Caydaruus Saalax Yuusuf iyo Dr. Cabdullaahi Xaashi Abiib iyo Mas’uuliyiin kale.
