Ra’iisul Wasaare ku-xiggeenka xukuummadda Federaalka Soomaaliya mudane Mahdi Maxamed Guuleed (Khadar) ayaa maanta shir-gudoomiyay kulankii ugu danbeeyay ee looga hadlayay qorshaha horumarinta shaqada dekadda Muqdisho, waxaana dhinacyadii loo xil-saaray ay soo dhameeyeen qorshihii ay ku shaqeyn laheyd dekadda Muqdisho, si looga jawaabo baahiyaha ganacsatada Soomaaliyeed.
Kulanka oo ka dhacay dekadda Muqdisho ayaa waxaa ka qeyb galay wasiirka dekadaha, wasiirka maaliyadda, wasiirka dekadaha, taliyaasha Booliiska iyo asluubta, gudoomiye ku-xigeenka maaliyadda gobalka Banaadir iyo maamulka dekadda Muqdisho.
Ra’iisul Wasaare ku-xigeenka xukuummadda Federaalka Soomaaliya mudane Mahdi Maxamed Guuleed (Khadar) ayaa sheegay in qiimayntii iyo talooyinkii qorshaha uu soo dhamaaday sidaa darteed dakaddu ay shaqeyn doonto habeen iyo maalin.
Shirka maanta laga yeeshay horumarinta shaqada dekadda Muqdisho ayaa daba socday laba shir oo kale oo horay ay u yeesheen guddiga loo xil-saaray kadib go’aankii guddiga amniga qaranka ee ahaa in Xafiiska Ra’iisul wasaaraha, wasaaradaha Maaliyadda, Dekedaha, Amniga iyo maamulka gobolka Benaadir la yimaadaan qorshe sida ugu dhaqsiyaha badan 24-saac ku shaqeyn karto Dekedda Muqdisho, si looga jawaabo baahiyaha Ganacsi ee ay qabaan Ganacsatada Soomaaliyeed.
