Kulan u dhaxeeya Ra’iisul Wasaaraha Xukumadda Federaalka Soomaaliya Mudane Maxamed Xuseen Rooble, madaxweynayaasha Galmudug, HirShabeelle iyo xubno ka tirsan midowga musharaxiinta ayaa haatan ka socda magaalada Muqdisho.
Shirka oo bilaawday Afurkii kadib, ayaa ka socda hoyga uu Madaxweynaha Galmudug Axmed Cabdi Kaariye Qoor Qoor ka degan yahay magaalada Muqdisho.
Kulankan ayaa looga hadlayaa sidii loo sii xoojin lahaa xasilloonida magaalada caasimadda ee Muqdisho, kadib qalalaasihii dhawaan dhacay.
Sidoo kale madaxda ayaa kulankaan diiradda ku saaraya xal u helidda arrimaha doorashooyinka dalka, waxayna madaxda dowladda federaalka dadaal xoog leh ugu jiraan, sidii doorasho nabdoon ay dalka uga dhici laheyd.
