Ra’iisul Wasaaraha xukuummadda federaalka Soomaaliya mudane Xasan Cali Khayre oo magaalada Garowe ku tegay socdaal shaqo oo maalma ku joogi doono deegaannada ay ka koobantahay Puntland ayaa maanta booqday xarumaha wasaaradaha dawlad gobaleedka Puntland.
Madaxweynaha dawlad gobaleedka Puntland Cabdiweli Maxamed Cali Gaas ayaa Ra’iisul Wasaaraha XFS Soomaaliya geeyay qaar kamid ah xarumaha wasaaradaha si uu u arko horumarka ka jira iyo sida Puntland ay u hir-gelisay mashruuca Isku-tasho, waxa uuna Ra’iisul wasaare Khayre ku ammaanay Mashruuca Isku-tasho ee lagu dhisay dawladnimada Puntiland, xarumaha wasaaradaha, jidadka iyo goobaha bulshada loogu adeeego isaga oo sheegay in Marshuucaasi uu ka yimid maskax ay leeyhiin reer Puntland laguna fuliyay xoola ay leeyihiin.
Ra’iisul Wasaare Khayre ayaa qiray in wax-qabad wanaagsan ay muujiyeen hoggaanka iyo bulshada reer Puntiland uuna ka muuqdo rabitaan dawladnimo, biseyl, dul-qaad iyo dadnimo ay tahay in ay uga daydaan bulshada Soomaaliyeed inteeda kale.
Dhanka kale, Isimada gobalka Nugaal ayaa munaasabad soo dhaweyn ah Garowe ugu sameeyay Ra’iisul Wasaara Xasan Cali Khayre iyo wafdiga la socda waxa ayna ku ammaaneen Ra’iisul Wasaaaraha dardargelinta shaqada ballaaran ee Qaranka iyaga oo ka codsaday in uusan ku niyad jebin caqabadaha kahor imaanaya inta uu ku guda jiro dadaalladda horuminta qaranimada Soomaaliya.
Ra’iisul Wasaare Khayre ayaa ka codsaday Isimada in laba jibbaaraan teegeerada dawladda, isaga oo ku ammaanay ka qayb qaadashada dadaallada Nabadda, waxa uuna ugu dambeyn ka ballan qaaday in uu shaqada Qaranka Soomaaliyeed u fulin doono si hufan, caqabad kasta oo timaadana uu u dul-qaadanayo si looga mira dhaliyo dadaalada lagu doonayo in Soomaaliya ay dib ula fal gasho aduunyada inteeda kale.
Ra’iisul Wasaaraha oo shalay gaaray Garowe waxa uu deegaannada Puntland ku sugnaan doonaa maalmaha soo socda, isaga oo 1-da bisha August ka qeyb gelayaa munaasabadda 20 sano guurada aasaaska maamulka Puntland.
