Ra’isul wasaaraha Jamhuuriyadda Soomaaliya mudane Cumar C/rashiid Cali Sharmaarke iyo wafdi balaaran oo uu hogaaminayay ayaa dalka dib ugu soo laabtay kaddib howlo shaqo ah oo uu ku tagay dalalka Jabuuti iyo Ethopia, waxaana garoonka diyaaradaha Aadan Cadde ku soo dhaweeyay xubno ka tirsan labada gole ee dowladda, iyo saraakiil ka tirsan ciidamada qalabka sida.’
Ra’isul wasaaraha oo maalmihii la soo dhaafay safar shaqo u jiray dalalka Jabuuti iyo Ethiopia ayaa kulamo la soo qaatay madaxda wadamadaasi oo ay ka wada hadleen arrimo kale duwan oo la xiriira xoojinta xiriirka ka dhaxeeya Soomaaliya iyo dalalkaasi.
Wasiirka arrimaha dibadda xukuumada Soomaaliya Dr C/salaan Cumar Hadliye oo qeyb ka ahaa wafdiga Ra’isul Wasaaraha ayaa ka warbixiyay safarkii Ra’isul wasaaruhu ku tagay wadamada Ethiopia iyo Jabuuti, isagoo sheegay in kulamo gooni gooni ah wadamadaasi ay kula soo qaateen mas’uuliyiinta labada wadan oo dalka Ciidama ay ka joogaan kuwaasi oo ka mid ah ciidamada midowga Africa Ee Amisom iyo xoojinta la dagaalanka Argagaxisada UGUS.
Wadamada Ethiopia iyo Jabuuti oo Soomaaliya daris la ah ayaa waxa ay ka mid yihiin wadamada xiriirka la leh Soomaaliya, iyadoo ciidamo ka socda dalalkaasi oo ka mid ah kuwa midowga Africa ee AMISOM ay joogaan dalka.
