Kooxda Madrid ayaa garoonkeeda Santiago Bernabeu 4-1 uga badisay kooxda Real Sociedad.
Kooxda Real Madrid ayaa waxaa ka maqnaa weeraryankooda hogaaminaya gool dhalinta horyaalka Spain ee Cristiano Ronaldo oo uu u bilowday ganaax labo kulan ah.
Kooxda Real Sociedad ayaa goolka la hor martay,waxaana daqiiqadii koobaad ee ciyaarta u dhaliyay ciyaaryahan Aritz Elustondo.
Ciyaaryahan James Rodriguez ayaa daqiiqadii sedaxaad ee ciyaarta gool barbardhac ah u dhaliyay kooxda Real Madrid.
Kooxda Real Madrid ayaa hogaanka ciyaarta qabatay dhamaadkii qeybtii hore ee ciyaarta,waxaana goolka labaad u dhaliyay ciyaaryahan Sergio Ramos,sidasi ayaana lagu kala nastay qeybtii hore ee ciyaarta.
Ciyaaryahan Karim Benzema ayaa qeybtii labaad ee ciyaarta goolka sedaxaad iyo kan afaraad u dhaliyay kooxda Real Madrid.
Kooxda Real Madrid ayaa horyaalka Spain ee La Liga ku hogaamineyso 51-dhibcood,halka kooxda Real Sociedad ay horyaalka uga jirto kaalinta 11-aad,iyadoo leh 22-dhibcood.
