Roobabkan oo watay dabeylo aan sidaa oo xoogganeyn ayaa saacado badan oo maanta ah ka da’ayay degmada Mahadaay iyo nawaaxigeeda, kuwaasoo ay ku diirsadeen dadka iyo duunyadaba.
Guddoomiyaha degmada Mahadaay Axmed Xuseen Afrax ayaa Radio Muqdisho u sheegay in roobabkasi dabeylaha watay uu dhaawac fudu ka soo gaaray laba nin kadib markii Mooto ay saarnaayeen uu ku soo dul dhacay geed weyn oo caan ku ah degmadaasi, kuna yaala halka laga galo buundada Mahadaay.
Mudane Axmed Xasan Afrax gudoomiyaha degmada Mahadaay ayaa dhinaca kale walaac ka muujiyay in wabigu ku fataho magaaladaasi, wuxuuna dalbaday in laga gacan siiyo sidii ay uga hortagi lahaayeen fatahaaddaasi.
Degmooyinka Mahadaay iyo Jowhar oo ka wada tirsan gobolka Shabeellaha dhexe ayaa laga cabsi qabaa in uu ku fataho wabiga Shabeelle, inkastoo degmada Jowhar ay ka socdaan howlo carro tuur ah oo looga hortagayo biyaha Wabiga.
