Ra’iisul wasaare ku-xigeenka xukuumadda federaalka Soomaaliya ahna gudoomiyaha guddiga gurmadka abaaraha ee heer qaran ayaa lacag dhan $91,835 ka gudoomay safiirka jaamacadda Carabta Amb. Maxamed Cabdalla Idriis.
Mudane Maxamed Cumar Carte, ayaa uga mahadceliyay safiirka iyo dowladaha Carabta sida ay dadka Soomaaliyeed u garabtaagan yihiin.
“Dowladaha walaalaheena ah ee Carabta waxa aan uga mahad celinayaa sida ay nooga gacansiinayaan wax u qabashada dadka Soomaaliyeed, waa kuwii ugu horeeyay ee ka soo jawaaba baaqii guddiga uu u jeediyay caalamka; marnaba ma hilmaami doono caawinaadooda oo timid waqti loo baahnaa”. ayuu yiri Carte.
Ra’iisul wasaare ku-xigeenka ayaa dadka Soomaaliyeed u cadeeyay in lacagtani ay ku bixi doonto meeshii loogu tala-galay.
Guddoomiye ku xigeenka labaad ee golaha shacabka Mahad Cabdalla Cawad, ayaa sidoo kale joogay kulanka lacagta lagala wareegay safiirka jaamacadda Carabta u qaabilsan Soomaaliya.
