Ra’iisul wasaare ku xigeenka dalka Mahdi Maxamed Guuleed ( Khadar ) ayaa ka warbixiyay sida Dowada Soomaaliya ay kaga jawaabtay fatahaadaha wabiyada Jubba iyo Shabeelle iyo dadaalada lagu xoojinayo u gurmashada dadkii ay qasaaradu ka soo gaartay fatahaadda wabiyada.
Mudane Mahadi Maxamed ayaa sharaxay deegaano ka tirsan Gobalka Gedo oo ay booqdeen, waxyaabaha ay kusoo arkeen iyo sida dadka uu u saameeyay Fatahaada.
“Waxaan indhaheena kusoo aragnay sida Baardheere wabiga u kala xiray dadka magaalada labadeeda dhinac, Luuq iyo Baardheere sida uu baabi’iyay Dalagii iyo Beerahii, dad badan oo Beereley Soomaaliyeed oo doonayay inay ka faa’iideeyaan waxsoo saarkii usoo baxay ayaa daadadkaas iyo Fatahaada Wabiga uu ka burburiyay tacabkii ay beereen”.ayuu yiri Ra’iisul wasaare kuxigeenka dalka.
Ra’iisul wasaare ku xigeenka dalka ayaa sheegay in ay ku dhex lugeeyeen qeybo ka mid ah degmada Doolow oo ay aad ugu riyaaqeen nabada ka jirta.
“Waxaan ku dhex lugeynay Degmada Doolow, iyadoo ay ka tarjumeyso nabad galyada qeybo badan oo Soomaaliya ka tirsan ay ku naaloonayaan, waxaan soo aragnay dadka degmada Doolow sida daadadkii iyo roobabkii waa weynaa ay u barakiciyeen dadkii magaalada qeybo badan oo ka mid ah”.
Ugu dambeyn Ra’iisul wasaare ku xigeenka dalka Mahdi Maxamed Guuleed (Khadar) ayaa sheegay in Dowlada Federaalka Soomaaliya ay baaq u dirtay Bulshada Soomaaliyeed iyo Saaxiibada Caalamka, dadaalkana uu meel wanaagsan marayo
“Dowlada Federaaalka tan iyo intii Guddida Gurmadka Qaran ee Fataahada la abuuray waxay baaq u dirtay Shacabka Soomaaliyeed iyo Bulshada Caalamka ee Saaxiibka aan nahay iyo Hay’addaha inagala shaqeeya Gargaarka, waxaan wali ku jirnaa aruurinta wixii ay ku deeqaan Buslahada Soomaaliyeed Ganacsato ha noqono Qurba joog ha noqoto ama Hay’addaha na taageera wixii tabarteena ah waan gaasriinay shalay Baardheere iyo Luuq, waana ku dadaaleynaa inaan halkaas kasii wadno “.
