Arday deeq waxbarasho lacag la’aan ah oo ka heshey dalka Sudan ayaa maanta ka amba baxay magaalada Muqdisho, kaddib markii Jimciyadda SEMA oo ah Jimciyad ay ku mideysan yihiin arday Soomaaliyeed ay gacan ka geysteen deeqdaasi.
Gudoomiyaha Jimciyadda SEMA Maxamed Nuur Cali oo la hadlay Radio Muqdisho ayaa sheegay in uu aad ugu faraxsanyahay in ardaydii ugu horeysay ay u diraan dalka Sudan, waxaana uu intaa ku daray in ardayda ay deeqda u direen ay ka koobanyihiin saddex arday, isla markaana labo kale ay todobaadkan u diri doonaan dalkaasi.
Maxamed Nuur Cali ayaa xusay in Jimciyadda la aas aasay 12-kii September ee sanadkii 2012-ka, waxaana uu intaa raaciyay in ay la dagaalamaan jahliga oo ay dhiiri gelinayaan ardayda dooneysa in ay waxbartaan.
“Jaamacadaha ayaan deeqo waxbarasho uga raadinaa, 55 arday ayaan wax u qabanay, kuwaasi oo aan kala hadalnay mas’uuliyiinta Jaamacadaha dalka ku yaalla, maadaama aysan awoodin in ay iska bixiyaan lacagaha lagu dhigto Jaamacadaha” ayuu yiri Maxamed Nuur Cali.
