Wasaaradaha Warfaafinta iyo Waxbarashada ee Jubbaland oo iskaashanayaa ayaa maanta waxay soo gaba-gabeeyeen Barnaamij ay ka wadeen Iskuulada ku yaala Kismaayo, kaasi oo ku saabsanaa farshaxanka Kalluunka, isla markaana hal ku dhigiisa ahaa cuna kalluunka,
Barnaamijkan ayaa waxaa ka qaybgalay arday kala socotay Iskuulada magaalada Kismaayo, waxaana Ardaydii ku guulaysatay Barnaamijkaan oo ahaa laba wiil iyo gabar la guddoonsiiyay abaal marinno kala duwan.
Goobta lagu bixinaayey abaalmarinta ayaa waxaa joogay Madaxda Wasaaradaha Warfaafinta, Waxbarashada iyo Madaxda Hay’adda GIZ oo Wasaaradaha ka caawinaysay hirgalinta barnaamijkaan.
Haashim Cabdiraxmaan Weheliye oo ah maamulaha iskuulka Khalid Binu Waliid oo ugu horeyn goobta ka hadlay ayaa boogaadiyay saddexda arday ee abaal marinnada lasiiyay oo ku guuleystay tartanka farshaxanka.
Axmed Xuseen Cabdulle Madaxa Waaxda iskuullada ee Wasaaradda Waxbarashada oo isna goob joog ahaa ayaa bogaadiyay ardayda dadaalkii ay ku soo bixiyeen si ay ugu guleystaan Barnaamijkaan.
Agaasimaha guud ee Wasaaradda Warfaafinta iyo Hanuuninta Daweynaha Jubbaland Cabdi Shukri Carab Cumar ayaa u mahadceliyay hay’adda GIZ oo barmaaijka farshaxanka kalluunka ka caawisay Wasaradda, isagoo sheegay in ujeeddada ay aheyd dhiirigalin loo samaynayo ardayda iyo in la soo saaro hibada ardayda.
