Safiirka Jamhuuriyadda Federaalka Soomaaliya ee dalka Uganda Danjire Cali Maxamed Maxamuud (Cali Cagabaruur ) ayaa booqasho ku tagay xafiiska midowga ardayda Soomaaliyeed ee dalka Uganda, isagoo halkaas kula kulmay madaxda ardayda Soomaaliyeed ee dalka Uganda.
Danjire Cali Cagabaruur ayaa halkaas kusoo indha indheeyay baahiyaha ay ardayda qabaan haddii ay ahaan lahayd dhanka qalabeenta xafiiska iyo caqabadaha haysta si guud ardayda Jaamacadaha ka barata Uganda.
Safiirka ayaa halkaas kula kulmay guddoomiyaha midowga Ardayda Soomaaliyeed Cabdimaajid Jaabir Salaad, guddoomiye ku-xigeenka midowga iyo Guddoomiyaasha ardayda jaamacadaha dalka Uganda, waxkabarata iyagoo safiirka usoo bandhigay caqabadaha dhanka waxbarashada ka haysto, sida shahaadooyinka iyo waxii la mid ah.
Safiir Cali Maxamed Maxamuud (Cali Cagabaruur ) Safiirka Soomaaliya ee dalka Uganda ayaa kulankaas inta uu socday ardayda u balan qaaday in dhammaan caqabada jira wax lagala qaban doono, isagoo sheegay in qalabeynta xafiiska waxa ka dhiman safaaradda ka qayb qaadan doonto.
Safiir Cali Cagabaruur oo ardayda la hadlayay ayaa ku booriyay ardayda sida isxilqaanka ah ee ugu adeegaan ardayda Soomaaliyeed ee Uganda waxkabarata iyagoo wax lagu siinin.
Uganda ayaa waxaa wax ka barta arday lagu qiyaasay ilaa 3 kun oo arday kuwaas oo heerarka kala duwan ee jaamacadaha wax ka diyaariya. Waxaana jira wadashaqeyn ballaaran oo ka dhaxaysa ardayda iyo safaaradda oo in mudda ah soo socotay.
