Safiirka Soomaaliya ee dalka Kuwait oo maanta booqasho ku tegay safaaradda Jabuuti ee dalkaasi ayaa tacsi u diray shacabka iyo Madaxda Jabuuti geerida ku timid Allaha u naxriistee Idiris Arnoud Cali Guddoomiyihii baarlamaanka Jabuuti, isagoo saxiixay buugga tacsida ee safaaradda Jabuuti ee Kuwait laga furay.
Danjire Cabdulqaadir Amiin Sheekh ayaa sheegay in marxuumka uu ahaa shaqsi ay si wanaagsan isu garanayeen, waxaana uu intaa ku daray in isaga oo ku hadlaya magaca safaaradda Soomaaliya ee Kuwait uu Jaaliyadda iyo safiirka uga tacsideynayo geerida Marxuumka, isagoo Alle uga baryay in uu ka waraabiyo Janadii Fardow ahayd.
“Anigoo ku hadlaya magaca safaaradda, kan howlwadeenada safaaradda iyo guud ahaan shacabka Soomaaliyeed, waxaan tacsi tiiraanyo leh u direyaa shacabka iyo Madaxda Jabuuti geerida ku timid guddoomiyihii Baarlamaanka dalka Jabuuti, waxaana ilaah ugu baryayaa in uu Janadii Firdowsa geeyo ehelkii iyo Asxaabtii uu ka baxayna uu samir iyo iimaan ka siiyo” ayuu yiri Danjiraha Soomaaliya ee Kuwait.
Sawir Qaade:-Carab Cabdiweli
