Madaxweyne Xassan Sheekh Maxamuud oo wafdigiisa ay ka mid yihiin siihaye yaasha wasaaradaha arrimaha dibedda,Maaliyadda,Tacliinta sare,Dastuurka ayaa waxaa garoonka diyaaradaha magaalada Qaahira kusoo dhaweeyay wasiirka tacliinta dalkan Masar.
Madaxweynaha Soomaaliya ayaa magaalada Qaahira u yimid casuumaad rasmi ah oo uu ka helay dhigiisa dalkan C/fitaax Siisii isagoo kulamo muhiim ah la qaadan doono inta uu ku suganyahay halkan madqaxda ugu sareysa dowladda Masar oo aan xiriir dhow oo walaalnimo leenahay.
Safiirka Soomaaliya u fadhiya magaalada Qaahira C/laahi Xassan Maxamuud oo la hadlay Tvga Qaranka ayaa sheegay in madaxweynuhu maalinta berito ah la kulmi doono xoghayaha guud ee jaamacadda Carabta Nabiil Al Carabi iyo xubno katirsan madaxda sare ee ururkaasi kuwaasoo uu madaxweynuhu kala hadli doono arrimo dhowr ah.
Sidoo kale madaxweynaha jamhuuriyadda Soomaaliya mudane Xassan Sheekh Maxamuud ayaa intaa kadib la kulmaya madaxweynaha dalka Masar C/fitaax Sii Sii oo ay ka wada hadli doonaan xiriirka labada dal iyo sidii ay dowladda Masar u taageeri laheyd dowladda federaalka.
Bashiir Khaliif Gaani
Qaahira Masar
