Muqdisho, 30ka Disember 2022: Wasaaradda deegaanka iyo isbedelka cimilada dowladda Federaalka Soomaaliya ayaa maamulka Gobolka Benaadir ku wareejisay dhir noocyo kala duwan leh oo qeyb ka qaadaneysa qorshaha dhireynta caasimadda.
Waa tallaabadii koowaad ee hirgelinta aragtida madaxweynaha ee “Soomaaliya Cagaaran” oo hiigsaneysa in 100 kun oo geed lagu beero magaada Muqdisho, si ay tusaale ugu noqoto dhammaan magaalooyinka kale ee dalka.
Geedaha oo ah nooc ku haboon cimilada Muqdisho, dhaqso kori og, bilicda caasimaddana qeyb weyn ka qaadan kara ayaa waxaa ku deeqay Great green wall iyo University of Peace.
Wasiir ku xigeenka wasaaradda Deegaanka iyo Isbedelka Cimilada Dr. Siciid Maxamed Cali ayaa sheegay in Wasaaradda oo fulineysa amarkii madaxweynaha ee ahaa in dhireynta gobolka Benaadir la billaabo ka hor dhammaadka sanadka ay gobolka ku wareejisay geedihii aasaaska u ahaa fulinta howshan, taas oo muujineysa ka go’naanshaha mas’uuliyiinta wasaaradda hirgelinta Soomaaliya Cagaaran.
“Waddada ugu haboon ee natiijada degdegta ah keeni karta ee aan kula dagaallameyno isbedelka cimilada waa inaan dhirtii la xaalufiyay dib usoo celino oo dhulkeena aan dib usoo nooleyno” ayuu yiri Dr. Siciid.
Wasaaradda Deegaanka iyo Isbedelka Cimilada ayaa ballan qaadday in dhammaan dalka lagu beeri doono 10 Milyan oo geed, si dib loogu soo celiyo doogga iyo keymaha loogana soo kabsado xaalufkii dalka ka dhacay muddadii burburka, taas oo la aaminsan yahay inay wax weyn ka bedeli doonto abaaraha soo laalaabtay.
-DHAMMAAD-
