Shaqaalaha Rayidka ee Wasaaradda Warfaafinta Xukuumadda Soomaaliya ayaa ka qeyb qaatay wareegga sideed iyo tobanaad ee barnaamijka isxilqaan ee lagu dhisayo xarumaha Danta Guud, kaasi oo qeyb ka ah dadaallada dib loogu dhisayo xarumihii loogu adeegi jiray bulshada.
Qaar ka mid ah shaqaalaha Wasaaradda Warfaafinta oo ka hadlay muhiimadda barnaamijka isxilqaan iyo sida ay ugu qeyb qaadanayaan xarumaha danta guud ayaa xusay inay aad ugu faraxsanyihiin in ay buuxiyaan kaltanka Wasaaradda uga soo aaday dib u dhiska xarumaha danta guud, waxaana ay barnaamijka ka fuliyeen xarunta Maktabadda Qaranka.
Isku duwaha barnaamijka isxilqaan ee shaqaalaha rayidka Soomaaliyeed ee Wasaaradda Shaqada iyo Arrimaha bulshada Ismaaciil Macalin Cabdulllaahi ayaa shaqaalaha Wasaaradda Warfaafinta ku amaanay kaalinta ay ka qaateen howlaha isxilqaan ee lagu dhisayo dalka.
Barnaamijka isxilqaan ayaa waxaa horey loogu soo dhisay xarumo muhiim ah oo kuwa danta Guud, waxaana socda dadaallo dib loogu soo celinayo bilicdii ay caasimaddu lahayd.
