Shaqaalahan ka socday waaxyada kala duwan ee Wasaaradda Maaliyadda Xukuumadda Federaalka Soomaaliya oo tabababarka loosoo xiray ayaa tiradooda gaaraysay 20-tan shaqaale oo gabdho iyo wiilal isuga jira.
Tababarkan oo soconayay muddo seddex todobaad ah oo lagu baranayay diyaarinta Miisaaniyadda dowladaha ayaa waxaa maal galinayay Bankiga horumarta iyadoo Ugandana marti galisay, halka fulinteedana lahayd Wasaaradda Maaliyadda Dowladda Uganda.
Munaasabad kooban oo shahaado lagu gudoon siinayay shaqaalaha tababarka dhamaystay oo ka qayb galeen madax ka socotay Safaaradda Jamhuuriyadda Federaalka Soomaaliya ee dalka Uganda iyo madax ka socotay Wasaaradda Maaliyadda ee Uganda hadal kooban laga jeediyay ayaa lagu amaanay shaqaalaha in ay ahaayeen shaqaale madax furan oo dhamaan casharadii loo dhigay ka faa’ideystay
Mid ka mid ah shaqaalaha tababarka dhamaystay oo lagu magacaabo Maxamed Xasan Sheekh Cali oo la hadlay warbaahinta Qaranka xafiiskeeda Kampala ayaa u sheegay in tababarkan uu ahaa mid muhiin ah oo faahfaahino hoose oo miisaaniyadda iyo qaabka documentiyadeeda loo diyaariyo si baratikaal ah usoo barteen.
Maxamed ayaa intaa ku daray in sidoo kale ay soo booqdeen wasaaradda Maaliyadda qaybteeda miisaaniyadda ay casharo muhiim ah iyana kasoo faa’ideen oo lasoo tusiyay qaabka dowladda Uganda u diyaariso miisaaniyadda dalkeeda.
Lataliyaha labaad ee Safaaradda Soomaaliya ee Uganda Jibriil Afyare oo munaasabadda shahaado gudoonsiinta ka qayb galay ayaa ugu dardaarmay shaqaalaha in cilmiga ay barteen uga faa’ideeyaan dalkooda oo hada magaciisa ku joogaan Uganda.
Inta badan Uganda ayaa waxaa yimaada shaqaalaha dowladda Federaalka wasaaradaheeda kala duwan iyagoo tababaro shaqadooda ku saabsan ku qaata si kor loogu qaado xirfadooda shaqaalenimo.
Fiidow Maxamuud Fiidow
Kampala Uganda
