Kulanka waxaa soo qaban qaabiyay unuga isku xirka daneeyeyaasha arrimaha Tamarta Soomaaliya, oo wasaaradda Tamarta iyo Kheyraadka biyaha ee dowladda federaalka Soomaaliya ka tirsan, iyadoo ay ka qeybgaleen mas’uuliyiinta wasaaradda iyo kuwa dowlad goboleedyada xubnaha ka ah dowladda federaalka Soomaaliya.
U jeedada ayaa aheyd, soo bandhigista qorshaha horumarineed ee Tamarta wadanka, iyadoo saraakiisha unuga isku xirka daneeyayaasha arrimaha Tamarta soo bandhigeen qorshe howleedkooda, qaabka ay tahay in looga wada shaqeeyo iyo waxyaabaha loo baahan yahay in la sameeyo gaar ahaan arrimaha sharciga iyo qeynuunka ah.
Shirka oo muddo labo maalin ah la qorsheeyay in uu socodo, ayaa waxaa si weyn looga hadli doonaa hanaanka wada shaqeyneyd ee ku aadan horumarinta Tamarta iyo sidii la isugu dubaridii lahaa dadaalada lagu horumarinaayo Tamarta wadanka, kaas oo ay ku howlan yihiin dhinacyo badan.
Agaasimaha guud ee wasaaradda Tamarta iyo Kheyraadka biyaha Soomaaliya, mudane C/waaxid Axmed Ibraahim, oo kamid ahaa mas’uuliyiintii kulanka ka hadashay ayaa sheegay in wasaaraddu gacanta ku heyso mashaariic badan oo lagu horumarinaayo arrimaha biyaha iyo Tamarta, isla markaana wasaaradaha dowlad goboleedyada ee shaqadooda ku abaaran tahay kala shaqeyn doonaan sidii mashaariicdaas looga miro dhalin lahaa.
Wasiirka Wasaaradda Tamarta iyo Kheyraadka biyaha ee xukuumadda federaalka Soomaaliya, mudane C/caziiz Xasan Maxamed oo ku magac dheer Lafta-gareen oo kulanka ka hadlay ayaa sheegay in wada shaqeyn dhow ay la yeelan doonaan dhammaan wasaaradaha dowlad goboleedyada xubnaha ka ah dowladda federaalka Soomaaliya.
Waxaa uu sidoo kale, sheegay in loo baahan yahay in looga wada shaqeeyo sidii hal wasaarad oo kale, ayagana dhankooda diyaar ay u yihiin talaabooyinka arrintaas lagu hirgelinaayo.
Wasiir ku xigeenka wasaaradda, Mudane Cismaan Libax Ibraahim, ayaa furitaanka shirka ka sheegay in mudadii ay joogeen xafiiska wasaaradda ay wax badan isku dayeen sidii loo dardargelin lahaa dadaalada lagu horumarinaayo arrimaha Tamarta iyo biyaha oo labada qeybood oo wasaaradu u igman tahay.
Shirka dhanka dowlad goboleedyada waxaa ka qeybgalay, wasiirka Tamarta iyo Kheyraadka biyaha Galmudug, Hirshabeele, wasiirkii hore ee Tamarta Jubaland, wasiir ku xigeenka Tamarta ee Koofur galbeed iyo xubno ka socday dowlad goboleedka Puntland.
