Masโuuliyiin ka socday Ururka waxbarashada islaamka oo maalmahan ku sugnaa Magaalada Muqdisho iyo Wasiiru Dowlaha Wasaaradda Waxbarashada iyo Tacliinta sare ee Xukuumadda Soomaaliya Mudane Cabdullahi Bile Nuur ayaa maanta siwadajir ah ugu dhawaaqay inay meel gabagaba ah ay mareyso Qabanqaabada Shirweyne dhaqaale loogu Uruurinayo waxbarashada Soomaaliya oo dhawaan ka dhici doona Dalka Kuwait.
Prof Khaanim Al-Najaar oo ah lataliyaha Ururka Waxbarashada Islaamka ee Arrimaha Soomaaliya ayaa sheegay in safarka ay ku yimaadeen Magaalada Muqdisho ujeedkiisu uu ahaa in Madaxda Dalka ugu sareysa iyo Wasaaradda waxbarashada ay Wadatashi kala sameeyeen Ajandayaasha Somaaliya ay la tagi doonto Shirka ka dhacaya Kuwait ee looga hadlayo Waxbarshada Soomaaliya.
Wakiilka Soomaaliya u qaabilsan Arrimaha Ururka waxbarashada islaamka iyo ururka Waxbarshada Carabta Cisaam Xuseen Jaamac ayaa sheegay in ujeedka shirka ka dhacaya Kuwait uu yahay in la horumariyo adeegyada waxbarashada dalka, isagoo uga mahadceliyay Wasaaradda waxbarashada iyo Tacliinta Sare sida ay u taageertay qabashada shirkaasi.
Wasiiru Dowlaha Wasaaradda Waxbarshada iyo Tacliinta sare ee Xukuumadda Soomaaliya Mudane Cabdullahi Bile Nuur ayaa u mahadceliyay Ururada waxbarashada islaamka iyo kan Carabta oo iska kaashanaya qabashada Shirka dhaqaalaha loogu Uruurinayo Horumarinta waxbarashada Soomaaliya iyo Dowladda Kuwait oo martigalineysa shirka, wuxuuna rajo wanaagsna ka muujiyay waxyaabaha Shirkaasi kasoo bixi doona .
Shirkan la filayo in dhawaan lagu qabto Dalka Kuwait ee dhaqaalaha loogu uruuriayo Horumarinta Waxbarshada Soomaaliya ayaa imaanaya, iyadoo wasaaradda waxbarashada iyo Tacliinta sare ay waddo dadaallo kor loogu qaadayo Tayada Waxbarashada Aasaasiga ah iyo tan sare ee dalka.
ย
