Wefdi oo uu hogaaminaayo Wasiiro dowlaha wasaaradda duulista iyo saadaasha hawada xukuumadda Soomaaliya oo maanta u amba baxay dalka Kenya ayaa waxaa ay ka qeybgali doonaa shir looga hadlayo sidii dowladda Soomaaliya loogu soo wareejin lahaa maamulka hawada Soomaaliya kaas oo ay soo qaban qaabisay hey’adda Qaramada Midoobay u qaabilsan duulimaadka rayidka caalamka ee ICAO.
Mudane Maxamed Isxaaq Cismaan “ Fanax” wasiiro dowlaha wasaaradda duulista iyo saadaasha hawada ayaa sheegay in shirkaasi uu yahay mid muhiim ah isla markaana ka socon doona 8-9 bishan Luulyo magaalada Nayroobi ee dalka Kenya.
“Shirka waxaa looga hadlayaa sidii hawada Soomaaliya oo meelaha kale laga maamulo loogu soo wareejin lahaa magaalada Muqdisho iyo sidii loo horumarin lahaa garoomada (diyaaradaha) Soomaaliya”, ayuu yiri Fanax.
Dowladda Soomaaliya ayaa mudooyinkan ka dambe ku howlaneyd sidii maamulka hawada Soomaaliya loogu soo wareejin lahaa taas oo mudadii dalka burburka ku jirey laga maamulayay dalka Kenya ayna gacanta ku heysay Qaramada Midoobay gaar ahaan hey’adda duulimaadka rayidka u qaabilsan ee ICAO.
